MIRROR成員｜姜濤為姜糖神徒機場衝突哽咽道歉　開直播無奈稱問題難解決

日前，MIRROR從外地演出回港，團中兩大人氣成員姜濤及盧瀚霆（Anson Lo）的粉絲姜糖及神徒卻為接機爭位有肢體衝突，鬧出「機場MMA」，並把事件放上網。

兩派粉絲雖然分隔開但打對台鬥大聲，當Anson Lo現身受訪時，疑有姜糖更起哄，當中有人更大叫「親生仔」諷刺Anson Lo，並罵經理人花姐為「八婆」。

昨日（4月22日），姜濤現身電影《12怪盜》謝票有回應粉絲衝突事件，及至晚上約10時又開直播回應。

MIRROR粉絲內鬥丨姜糖神徒接機爭位發生衝突　教主Anson Lo：大家因為咁樣受傷我會好肉赤

▲ 姜濤與Jer一同現身戲院為《12怪盜》謝票。

姜濤認為粉絲應以安全為上

在直播中，姜濤指在完成演唱會回港時就知道粉絲在機場發生衝突，他稱：「我包括公司所有人，我哋真係想了解返成件事，發覺100個人入面有100種唔同講法，所以我覺得喺而家呢個階段，我哋冇辦法考證件事係點樣。」

他認為粉絲們應該以安全為上，而粉絲之間的衝突越來越嚴重，他坦言不知道如何處理，唯有一直作出呼籲。

他說：「冇人希望支持自己嘅人受到委屈或受傷，因為我覺得身為artist最大責任，係帶歡樂畀所有支持你嘅人，呢個都係我喺MIRROR學習緊嘅嘢，亦都希望我可以做到嘅嘢。」

▲ 姜濤深夜開直播回應粉絲機場衝突事件。（直播截圖）

姜濤：呢個問題好難去解決到

姜濤指自己與Anson Lo也曾商量如何處理事件，無奈最終沒有結果，「我哋唔知點做，惟有繼續呼籲大家，呢個問題好難去解決到。」

他續稱：「我哋係咪仲有啲地方做得唔夠好，我哋係咪可以再做多一步，就可以避免呢啲事情發生，我自己一直諗緊呢啲問題，我係咪應該同大家講sorry，係咪因為我自己做得唔夠好，所以先至導致呢個事情發生？」

同時，姜濤作出道歉表示：「我唔知，唔知道可以點樣做，所以，我如果有做得唔好嘅地方，我想同大家講聲抱歉，可能有更加好嘅方式去處理，但so far到而家，我未有任何頭緒可以做啲乜嘢，我覺得可以做嘅就係，透過呢個直播話畀大家聽，無論你係支持我個人又好全體又好邊個artist又好，大家真係有一個好嘅身體好嘅心情，先會令你嘅生活更加愉快，先會令你哋支持我哋更加開心。」

▲ 姜濤、柳應廷（Jer）為《12怪盜》謝票。

「我同Anson Lo有為呢啲事情唔開心」

姜濤坦言：「我同Anson Lo有為呢啲事情唔開心，因為我哋之間有被呢啲嘢影響到。」

此外，他直指：「我哋係有互相唔理解過嘅，但我哋後尾都知道，大家緊張我哋，先至會有呢啲事情發生，所以後尾好彩地，我哋依家真係好好嘅朋友嚟。因為我哋係好好嘅朋友，所以更加覺得難過，唔知點做！」

在直播過後，姜濤再於IG限時動態發「黑底白字」：「可能有說的不好的地方，希望大家多多包涵。」

最新影片推介：吳家樂專訪

HKET App已全面升級，TOPick為大家推出一系列親子、健康、娛樂、港聞及休閒生活資訊及影片。立即下載︰https://onelink.to/f92q4m

追蹤TOPick Whatsapp頻道睇最新資訊︰http://tinyurl.com/3dtnw8f5